Col 4 | KYG | STEP | Ali'ya aepa vaya'mogitapae, hu'na, yagaitapa ne'apataya vaya'mo mai'naya kava huno Ala kava netapimo koku'napi'mo mai'niye, huta ago afi'naya'mofe'mo ali'yatapimo ne'aliya vaya'aitegamo fatago kava'mo hutapa alagepa ya'mo alita apamiyo.

Colossians 4

1 Ali'ya aepa vaya'mogitapae, hu'na, yagaitapa ne'apataya vaya'mo mai'naya kava huno Ala kava netapimo koku'napi'mo mai'niye, huta ago afi'naya'mofe'mo ali'yatapimo ne'aliya vaya'aitegamo fatago kava'mo hutapa alagepa ya'mo alita apamiyo.

Nunumu nehutapa alagepa kava'mo hiyo, huno hu'niya gemae

2 Nunumu nehutapae'mo o'ataleta alagepa huta kava yagai'netapa Gotifeke'mo hao ke hetapa nunumu huge huge hutapa maiyo. 3 Nunumu nehutapae'mo Goti ge'amo aeta hakalo huta hapa paisuna ka'mo valino latesigeta Kalaisife'mo ava gemo hogoteno alino fala ki male'neno hemenimo alino lave li'niya ge'amo hapa paisunafe'mo nunumu hutapa lateyo. Mani gelefe'mo ali'a kalavusi hu'a nate'nae. 4 Goti'a alagepa hu'na ae'na hakalo hu'na hapa paisuvafe'mo hau'niye. Ani kava hu'na hisuvafe'mo nunumu hutapa nateyo. 5 Lapakaemo malaga vaya'aife'mo alagepa huta lapakesamo ne'afitapa alagepa kava'mo hiyo. Lapakaemo alagepa kava'mo hisaya afina'mo ago hano hugiyanagi alagepa kava'mo hutapa alagepa ali'ya'mo aliyo. 6 Haga'age gemo nehane, hu'a hisayafe'mo ge hugefe'mo alagepa ge'age'mo hiyo. Ge'apile'mo alagepa huta aeta atagaina hutapa hapa paisayafe'mo alagepa huta afi'netapa hapa paiyo.

Polo'a lole vekala'mo alino anate'nige'ana u'na'a gemae

7 Tikikasi'a lahau layamopafi'mo lahau'niya konagatimo'mo o'ataleno muki afina'mo Ala kava ne'mo ali'ya'amo lagae'e'mo lokaeno ne'aliya vekamo'a uno muki kavafe'mo nava gemo huno lapa paigiye. 8 Agaemo uno haiya kava hutapa mai'nafi huno lapaketeno'ae'mo lapaipamo alino lokiya vaino lapatesiya gemo lapa paisiyafe'mo ali'na atesugeno ugiye. 9 Avagi huno visiya vekamo Onesimasife'mo lahau layamopafi'mo lahau'niya konagatimo'a ali'ya'amo o'ataleno muki afina'mo alagepa ali'ya'mo ne'aliya vekamo lapakaepati vekamo mai'niye. Anakaemo u'anae'mo manile'mo muki afole ai'niya kavafe'mo ava gemo hu'ana lapa paiga'ae.

Kolosi vaya'aife'mo ge apamamae'naya gemae

10 Alisitakasi'a nagae'e'mo kalavusimo hu'niya vekamo'a ge lapamamae'niye. Maki'a Manamasi avu'amo'mo ge lapamamae'niye. Agaefe'mo, esigetapae'mo alita falu fala huta atetetapa ne'ya'mo amiyo, hu'na lapa pai'nove. 11 Yesu'a mago agi'amo Yasitasi'a ge lapamamae'niye. Mani lole'e mago'e vaya'mo Yu nofi vaya'mo mai'ne'a Goti'a yagaino apatesiya kava'mo afole aisiyafe'mo nagae'e'mo lokae'a ali'ya'mo ne'aliye. Alagepa hu'a naha mae'nageno naipamo'mo falu hu'niye. 12 Epafalasi'a lapakaepati vekamo'a Kalaisi ali'ya'mo ne'aliya vekamo'a ge lapamamae'niye. Lapakaemo alopa Kalisitini vaya'mo hamaletetapa o'ataleta lokiya vaita mai'netapa Goti'a hau'niya kava'mo agetetapa akame hisayafe'mo lusi kava huno nunumu huno nelapate. 13 Agaemo lapakaetegamogi Leyotisiya taonifi'mo mai'naya vaya'aitegamogi Hilapolisi taonifi'mo mai'naya vaya'aitegamogi huno lokiya kava'mo huno agesa afifi huno ali'ya'mo ne'alige'nae'mo lapa nepauve. 14 Luki'a lahau layamopafi'mo lahau'niya lota veka'e Nimasi'e'mo ge lapamamae'na'ae. 15 Lagaefe'mo Leyotisiya konagatimogi'e Nipa'e'mo siosi vaya'mo no'afi'mo ali'a anupa hu'a mai'naya vaya'aife'mo ge apamamaetapa hapa paiyo.

16 Mani avo'mo alitapa lekana paitetapae'mo Leyotisiya siosi vaya'mogi lekana paisayafe'mo alitapa apamiyo. Ani kava hu'a Leyotisiya konagatimogitapamo mago avo'mo ali'a lapamisagetapa lekana paiyo. 17 Lapakaemo Akipasife'mo Ala kava ne'mo'a kami'niya ali'yakamo alika hano huvo, hutapa ha paiyo. 18 Ani gemo hute'nae'mo hemenimo nagaemo avo'mo nekaeya vekalegati'mo avo kayo'mo ali'na avo'mo kae'nae'mo, Polo'na ge lapamamae'nove, hu'na avo'mo nekaove. Kalavusifi'mo mai'novanagi lapake okanino. Goti'a fiku lapa maeno lapamino. He lama ge.